Melody Mesh - Keyin "demadi" demang!

Otang bugun — yoningda,
Onang bugun — yoningda,
Erta — faqat yodingda...
Keyin «demadi» demang!

Yoshlikning kuni qisqa,
Sog'likning davri qisqa,
Fursatning o'zi qisqa —
Keyin «demadi» demang!

Bolang senga qaraydi,
Har ishingni sanaydi,
Sen qilganni qiladi —
Keyin «demadi» demang!

Ur-kaltakdan so'z og'ir,
Yarasiga tuz og'ir,
Bitmas yara — iz og'ir —
Keyin «demadi» demang!

Bu dunyoda bog' qolar,
Molu davlat, tog' qolar,
Yomon ishdan — dog' qolar —
Keyin «demadi» demang!

Aytmay ketsam — qarz bo'lar,
Aytib ketsam — farz bo'lar,
Qurbon aytdi — arz bo'lar:
Keyin «demadi» demang!